Դուբայում ոստիկանությունն ընդամենը ութ ժամվա ընթացքում ձերբակալել է 25 միլիոն դոլար արժողությամբ հազվագյուտ վարդագույն ադամանդ գողացած երեք գողի: Քարը էմիրություն է բերել Եվրոպայից մի ոսկերիչ, որը համաձայնել է այն ցույց տալ վարձակալված առանձնատանը պոտենցիալ հաճախորդին, հաղորդում է CBS News-ը:
Սակայն պարզվել է, որ հանդիպումը ծուղակ է եղել. թանկարժեք քարն անհետացել է հենց «դիտման» ժամանակ:
Արտակարգ իրավիճակների գծին զանգ է ստացվել. «Ես եկա հաճախորդի մոտ՝ ադամանդը ցույց տալու: Նրանք նայեցին ադամանդն ու… գողացան»,- պատմել է ցնցված ոսկերիչը:
Ոստիկանությունն անմիջապես սկսել է որոնումները: Ըստ Դուբայի ոստիկանության ներկայացուցիչների՝ օգտագործվել են մասնագիտացված աշխատանքային խմբեր, ինչպես նաև արհեստական բանականության ամենաժամանակակից տեխնոլոգիաներ: Շուտով ձերբակալվել են ասիական երկրներից երեք տղամարդ: Դուբայի լրատվամիջոցների գրասենյակի հրապարակած տեսանյութում երևում են կասկածյալների ձերբակալության տեսագրությունները՝ թաքցված դեմքերով:
Դուբայը համարվում է աշխարհի ադամանդի առևտրի կենտրոններից մեկը, և էմիրության իշխանությունները հատկապես հպարտանում են այս տարածքում իր անվտանգությամբ և վերահսկողությունով: Հազվագյուտ քարը վերադարձնելու հաջող գործողությունը ևս մեկ անգամ հաստատում է քաղաքի՝ որպես միջազգային գործարքների ամենաապահով վայրերից մեկի հեղինակությունը: