Հոգեկան խանգարում ունեցող ուղևորը փորձել է մտնել Ֆրանսիայից Պորտուգալիա թռչող Easyjet ավիաընկերության ինքնաթիռի օդաչուների խցիկ, ինչը ստիպել է ինքնաթիռին վերադառնալ Լիոնի օդանավակայան, հայտնում է AFP-ն։
Ըստ ֆրանսիական ոստիկանության հայտարարության, մյուս ուղևորները պահել են տղամարդուն, մինչև ինքնաթիռը կրկին վայրէջք է կատարել։ Easyjet ավիաընկերությունից հայտնել են, որ Լիոնից Պորտու թռչող ինքնաթիռը նոր էր օդ բարձրացել ուրբաթ ուշ երեկոյան, երբ տեղի է ունեցել միջադեպը։
«Լիոնից Պորտու թռչող EJU4429 չվերթը թռիչքից անմիջապես հետո վերադարձվել է Լիոն՝ ուղևորի պահվածքի պատճառով։ Ժամանելուն պես ինքնաթիռը դիմավորել է ոստիկանությունը, և հենց որ ոստիկանությունը հեռացրել է ուղևորին, չվերթը շարունակվել է դեպի Պորտու»,- ասվում է Easyjet-ի հայտարարության մեջ։
Ոստիկանությունից հայտնել են, որ 26-ամյա Պորտուգալիայի քաղաքացին բժշկական զննություն է անցել, որը ցույց է տվել, որ նա տառապել է օդային հիվանդությունից և զառանցանքից։ Նա հոսպիտալացվել է ֆրանսիական հիվանդանոցում։