Նախագահը (ԱՄՆ, Դոնալդ Թրամփը — խմբ.) ագրեսիվ տնտեսական ճնշում է կիրառել: Օրինակ՝ Հնդկաստանի նկատմամբ երկրորդային մաքսատուրքերը սահմանվել են, որպեսզի ռուսների համար դժվար լինի հարստանալ իրենց նավթային տնտեսությունից: Այս մասին NBC-ին տված հարցազրույցում հայտարարել է ԱՄՆ փոխնախագահ Ջեյ Դի Վենսը:
«Թրամփը փորձել է հստակ ցույց տալ, որ Ռուսաստանը կարող է կրկին հրավեր ստանալ համաշխարհային տնտեսություն վերադառնալու համար, եթե դադարեցնի սպանությունները: Բայց նրանք կշարունակեն մեկուսացված մնալ, եթե չդադարեցնեն սպանությունները», — հայտարարել է Վենսը։
Նրա խոսքով՝ Թրամփը Կրեմլի վրա ավելի շատ տնտեսական ճնշում է գործադրել՝ պատերազմը դադարեցնելու համար, «քան Բայդենը երեք տարվա ընթացքում», հաղորդում է DW-ն։ «Ի վերջո, մենք կամ կհաջողենք, կամ կհայտնվենք փակուղու մեջ։ Եվ եթե մենք հայտնվենք փակուղու մեջ, ապա մենք կշարունակենք բանակցությունների և ճնշման գործընթացը։ Սա ակտիվ դիվանագիտություն է, որը պետք է վերջ դնի այս պատերազմին», — ասել է ԱՄՆ փոխնախագահը։ Նա վստահություն է հայտնել, որ Մոսկվան չի փորձում դանդաղեցնել Ուկրաինայի հարցով հնարավոր խաղաղության համաձայնագիրը։
Նա հավելել է, որ Ռուսաստանը «զգալի զիջումների» է գնացել Դոնալդ Թրամփին՝ Ուկրաինայում պատերազմը դադարեցնելու իրենց պահանջների մի մասի հարցում։ Ըստ Վենսի՝ ԱՄՆ նախագահը Մոսկվայի և Կիևի հետ «շատ ագրեսիվ, շատ եռանդուն դիվանագիտություն» է վարում, որն արվում է Ուկրաինայի դեմ Ռուսաստանի պատերազմը դադարեցնելու և փոխզիջումային լուծում գտնելու համար։ «Կարծում եմ, որ ռուսները զգալի զիջումների գնացին նախագահ Թրամփի հանդեպ այս՝ 3,5 տարվա հակամարտության ընթացքում առաջին անգամ»,- ասել է Վենսը,- «Նրանք իսկապես պատրաստ էին ճկունություն ցուցաբերել իրենց հիմնական պահանջներից մի քանիսի հարցում»։
Մասնավորապես, ԱՄՆ փոխնախագահի խոսքով, Մոսկվան ընդունել է, որ «պատերազմից հետո Ուկրաինան կունենա տարածքային ամբողջականություն»։ Նա չի հստակեցրել, թե պատերազմական գործողությունների դադարեցումից հետո Ռուսաստանը որ տարածքներն է պատրաստ թողնել Կիևի վերահսկողության տակ։ Բացի այդ, ըստ նրա, Ռուսաստանը «ընդունել է, որ իրենց չի հաջողվի Կիևում խամաճիկային ռեժիմ հաստատել»։ «Նորից եմ ասում՝ արդյո՞ք նրանք կատարեցին բոլոր զիջումները։ Իհարկե ոչ։ Բայց մենք առաջընթաց ենք գրանցում»,- հայտարարել է Վենսը։
Նա ևս մեկ անգամ հաստատել է, որ ամերիկացի զինվորականները չեն գնա Ուկրաինա, սակայն Վաշինգտոնը ակտիվ դեր կխաղա անվտանգության երաշխիքների ապահովման գործում։