«Եթե նախագահ Պուտինը կարծում է, որ կարող է ժամանակ ձգել, ապա նա սխալվում է», — ասել է Գերմանիայի արտաքին գործերի նախարար Յոհան Վադեֆուլը, հաղորդում է DW-ն։
Գերմանացի նախարարի խոսքով՝ Մոսկվայի վրա պետք է շարունակել ճնշում գործադրել, հենց այդ պատճառով էլ ԵՄ-ն պատրաստում է պատժամիջոցների 19-րդ փաթեթը:
Գերմանիայի արտաքին գործերի նախարարը պնդում է, որ բանակցային գործընթացում հիմա հերթը Պուտինինն է. նա պետք է ապացուցի, որ իսկապես պատրաստ է աշխատել Ուկրաինայում շարունակվող պատերազմում արդար խաղաղության հասնելու ուղղությամբ։ «Ակնհայտ է, որ այս հարցում կան լուրջ կասկածներ»,- նշել է Վադեֆուլը և հավելել, որ Կիևն արդեն քայլ է արել, երբ առանց նախապայմանների համաձայնել է խաղաղ բանակցություններին։
Միևնույն ժամանակ, Վադեֆուլը շեշտել է՝ «Մեկ բան հստակ է. ուկրաինացիների մեջքի ետևում բանակցություններ չեն արվի: Սա մեր ընդհանուր եվրոպական խոստումն է»: Նախարարը Կիևին վստահեցրել է Եվրոպայի «քաղաքական, տնտեսական և ռազմական» աջակցության մասին: