Գերմանիայի իշխանությունները մտադիր են դեռահասներին արգելել չափահասների ներկայությամբ ոգելից խմիչք օգտագործել, ARD մեդիա ընկերության Morgenmagazin հաղորդման ժամանակ հայտարարել է կախվածությունների և թմրանյութերի հարցերով դաշնային կառավարության հանձնակատար Հենդրիկ Շտրեկը։
Ըստ Գերմանիայի օրենսդրության՝ դեռահասներին թույլատրվում է գարեջուր, գինի և շամպայն խմել 14 տարեկանից՝ ծնողների կամ խնամակալների ներկայությամբ՝ հասարակական վայրերում, ինչպես նաև բարերում և ռեստորաններում։ Շտրեկը նշել է, որ դրանից ոգելից խմիչքը դեռահասների համար ավելի առողջարար չի դառնում, քանի որ նրանց օրգանիզմը դեռևս չի ավարտել կենսական կարևոր օրգանների, այդ թվում՝ ուղեղի զարգացումը։
Դաշնային կառավարության կախվածությունների և թմրանյութերի հարցերով հանձնակատարը վստահեցրել է, որ Գերմանիայում երիտասարդների շրջանում ալկոհոլիզմի համաճարակ չկա։ Երկրի իշխանությունները ցանկանում են կանխարգելիչ միջոցներ ձեռնարկել։ Շտրեկը նշել է նաև, որ ավելի ու ավելի շատ գերմանացի դեռահասներ են հրաժարվում ոգելից խմիչքից, ուստի կառավարությունը կցանկանար խթանել այդ միտմանը։
2025 թվականի հունիսին Մեկլենբուրգ-Առաջնային Պոմերանիայի առողջապահության և սպորտի նախարարությունը հանդես եկավ նմանատիպ նախաձեռնությամբ: Ինչպես այն ժամանակ հայտարարել էր գերատեսչության խոսնակ Սիլվիա Գրիմը, Գերմանիայում ոգելից խմիչքի օգտագործումը հավանության է արժանանում հասարակության կողմից և ՝ այլ եվրոպական երկրների հետ համեմատ գտնվում է բարձր մակարդակի վրա: Նախաձեռնությունը միաժամանակ աջակցել են Գերմանիայի այլ դաշնային նահանգների առողջապահության նախարարությունները։
Ինչպես գրում է dpa-ն՝ վկայակոչելով վերջին սոցիոլոգիական ուսումնասիրություններին, 12-17 տարեկան աղջիկների 6,9 տոկոսը և տղաների 12,4 տոկոսը շաբաթական առնվազն մեկ անգամ ոգելից խմիչք են օգտագործում: Որպես կանոն, գերմանացի դեռահասներն առաջին անգամ ալկոհոլ են փորձում 14 տարեկանում կամ նույնիսկ ավելի վաղ:
Երիտասարդները շարունակում են ռիսկի խմբում մնալ: Ըստ Հայդելբերգի Գերմանական քաղցկեղի հետազոտությունների կենտրոնի (DKFZ) 2022 թվականին հրապարակած վերջին «Ալկոհոլի ատլասի», ալկոհոլիզմը լայնորեն տարածված է դեռահասների շրջանում: Այն ազդում է 16-17 տարեկան երիտասարդների մեկ քառորդի և երկրի 18-25 տարեկան բնակչության մոտավորապես 30 տոկոսի վրա, հաղորդում է Deutsche Welle-ն: