Եվրոպական հանձնաժողովը ցանկանում է Կիպրոսում տարածաշրջանային հրդեհաշիջման կենտրոն ստեղծել, որը կարող է նաև օգնել Մերձավոր Արևելքի երկրներին պայքարել խոշոր անտառային հրդեհների դեմ: Դրա մասին չորեքշաբթի Եվրախորհրդարանում իր ամենամյա ելույթում հայտարարել է Եվրահանձնաժողովի նախագահ Ուրսուլա ֆոն դեր Լայենը, հաղորդում է «Европейская правда»-ն:
Եվրոպական հանձնաժողովի ղեկավարը հիշել է ԵՄ-ում անտառային հրդեհների սեզոնը, որը վերջին տարիներին դարձել է ամենավատթարներից մեկը, և կոչ է արել նոր գործիքներ կիրառել այդ բնական աղետների դեմ պայքարելու համար:
«Ահա թե ինչու մենք կառաջարկենք Կիպրոսում նոր եվրոպական հրդեհաշիջման կենտրոն ստեղծել, որը կարող է նաև աջակցություն ցուցաբերել մեր տարածաշրջանային հարևաններին»,- հավելել է նա:
Ֆոն դեր Լայենը չի ներկայացրել կոնկրետ մանրամասներ, թե ինչպես է գործելու Կիպրոսում կենտրոնը և ինչ ռեսուրսներ կունենա:
Մեկնաբանելով Եվրահանձնաժողովի ղեկավարի հայտարարությունը X-ում, Կիպրոսի նախագահ Նիկոս Քրիստոդուլիդեսն այն անվանել է «չափազանց կարևոր» տարածաշրջանի համար:
Հուլիսին Կիպրոսում տեղի ունեցավ վերջին տարիների ամենասարսափելի անտառային հրդեհներից մեկը, որի հետևանքով զոհվեց երկու տարեց մարդ և ոչնչացվեցին հարյուրավոր տներ։
Եվրամիությունում անտառային հրդեհների ընթացիկ սեզոնի ընթացքում այրվել է ավելի քան 1 միլիոն հեկտար։