Իսրայելի ոստիկանությունը ձերբակալել է Քնեսեթի նախկին պատգամավոր Հանին Զոաբիին՝ ահաբեկչական խմբավորման անդամ լինելու և ահաբեկչություն հրահրելու կասկածանքով, հայտնում է Ynet լրատվական կայքը։
Զոաբին, որը 2009-ից 2019 թվականներին Քնեսեթի պատգամավոր է եղել պաղեստինյան ազգայնական «Բալադ» կուսակցությունից, հայտնի է Իսրայելում կառավարության իր կտրուկ քննադատությամբ։
Ոստիկանությունը հաստատել է 59-ամյա Զոաբիի ձերբակալությունը՝ մի քանի ամիս առաջ արտերկրում կայացած հակաիսրայելական համաժողովում նրա արտահայտությունների վերաբերյալ ստացված բողոքներից հետո։
«Ապացույցների հավաքման և համապատասխան տվյալների համադրման արդյունքում պարզվել է, որ նրա մեկնաբանություններում առկա են ահաբեկչական խմբավորման հետ կապ ունենալու և ահաբեկչություն հրահրելու կասկածներ», – նշված է ոստիկանության հայտարարությունում։
Նշվում է, որ նրան կանչել են հարցաքննության՝ ստանալով անհրաժեշտ թույլտվությունները, ինչը ենթադրում է, որ գլխավոր դատախազությունը հնարավոր է՝ հաստատել է ձերբակալումը։
«Իսրայելի ոստիկանությունը հանրային անվտանգության նպատակով խիստ միջոցներ կձեռնարկի ցանկացածի դեմ, ով գովաբանում է ահաբեկչական խմբավորումները և թշնամական պետությունները և խրախուսում է նրանց գործողությունները պատերազմի ժամանակ, առցանց կամ այլ վայրերում», – ասված է ոստիկանության հայտարարությունում։