Մոլդովայի ոստիկանության գլխավոր տեսչությունը և Կենտրոնական ընտրական հանձնաժողովը հայտնել են, որ այսօր արձանագրվել են երկրի սահմաններից դուրս գտնվող ընտրատեղամասեր ընտրողների կազմակերպված տեղափոխման դեպքեր, հայտնել է Մոլդպրեսը։
Արտաքին գործերի նախարարությունը նույնպես տեղեկացրել է, որ մի շարք երկրներում՝ Բրյուսելում (Բելգիա), Հռոմում և Գենուայում (Իտալիա), Բուխարեստում (Ռումինիա), Էշվիլում (ԱՄՆ) և Ալիկանտեում (Իսպանիա), գրանցվել են կեղծ ահազանգեր՝ ընտրատեղամասերում տեղադրված ռումբերի մասին։
Մոլդովայի նախագահ Մայա Սանդուն տեսաուղերձով դիմել է քաղաքացիներին՝ հայտարարելով․ «Մոլդովան մեր երկիրն է, ոչ թե «Շոր» հանցավոր խմբավորման։ Ապացուցենք, որ մենք ավելի ուժեղ ենք, քան նրանց կեղտոտ փողերը»։ Ըստ նրա, իշխանությունները տեղեկացվել են մի քանի դեպքերի մասին, երբ ընտրողներին ապօրինի կերպով տեղափոխել են արտասահմանյան ընտրատեղամասեր՝ գումարի դիմաց։
«Մի քանի երկրներում ունենք կեղծ ահազանգեր ռումբերի մասին, և ես շնորհակալ եմ այն մարդկանց, ովքեր համբերությամբ սպասում են, մինչև ոստիկանությունը ստուգում է տարածքները։ Մենք արձանագրել ենք, այսպես կոչված, «կարուսելի» դեպքեր, երբ փորձում են մաքուր քվեաթերթիկը դուրս բերել ընտրատեղամասից՝ հետագայում այն վերադարձնելու արդեն դրոշմված։ Արձանագրվել են նաև մի քանի դեպքեր, երբ «Շոր» խմբավորման ներկայացուցիչները փորձում են խոչընդոտել քվեարկության ընթացքին, հատկապես այն տեղամասերում, որտեղ մասնակցությունը բարձր է», – նշել է Սանդուն։
Նախագահն ընդգծել է, որ «այս բարդ պայմաններում քաղաքացիների ազնիվ ձայները կարող են փրկել Մոլդովան»։ «Գնացեք քվեարկության Ֆրանսիայում, Իսպանիայում, Իռլանդիայում, Ռումինիայում, բոլոր այն երկրներում, որտեղ այսօր գտնվում եք։ Տանը և արտերկրում՝ գնացեք քվեարկության հենց հիմա, որպեսզի հասցնեք քվեարկել մինչև ընտրատեղամասերի փակվելը՝ ժամը 21։00-ը», – կոչ է արել Մայա Սանդուն։