Լատվիան իր օդային տարածքով Ռուսաստանի նախագահ Վլադիմիր Պուտինի ինքնաթիռին թռչելու թույլտվություն տրամադրելու հնարավորություն չի տեսնում։ LETA լրատվական գործակալությանը հայտնել է Լատվիայի արտգործնախարարությունը՝ մեկնաբանելով ԱՄՆ և ՌԴ նախագահների միջև Բուդապեշտում նախապես ծրագրված, բայց չհաստատված հանդիպումը, հայտնել է Европейская правда-ն՝ հղում անելով Delfi պորտալին։
Արտգործնախարարությունը նշել է, որ Լատվիան աջակցում է Ռուսաստանի ագրեսիան Ուկրաինայի դեմ դադարեցնելու ԱՄՆ նախագահ Դոնալդ Թրամփի ջանքերին, սակայն դեռևս որևէ ցուցում չկա, որ Պուտինը պատրաստ է մասնակցել կառուցողական խաղաղության գործընթացին։ Ռուսաստանը շարունակում է սրել իր օդային հարձակումները Ուկրաինայի դեմ՝ սպանելով խաղաղ բնակիչների և ոչնչացնելով քաղաքացիական և կարևորագույն ենթակառուցվածքները։
«Լատվիան Ուկրաինայի դեմ պատերազմը սկսած և Ռուսաստանի կողմից միջազգային իրավունքի լուրջ խախտումների, դրանց թվում՝ Ուկրաինայում ռազմական հանցագործությունների համար պատասխանատու անձին իր օդային տարածքով թռչելու թույլտվություն տրամադրելու հնարավորություն չի տեսնում»,- հայտարարել են նախարարությունում։
Ինչպես Ավելի վաղ հաղորդվել էր, Բուդապեշտում նախատեսված էր Թրամփի և Պուտինի հանդիպում՝ Ուկրաինայում պատերազմի դադարեցման հարցը քննարկելու համար։ Ոչ մի ամսաթիվ չի հայտարարվել, ոչ էլ հստակեցվել է, թե ինչպես է Պուտինը մեկնելու Հունգարիայի մայրաքաղաք, քանի որ Եվրամիության օդային տարածքում թռիչքների համար ռուսական ինքնաթիռների նկատամամբ սահմանափակումներ են գործում։
Ավելի վաղ Լեհաստանի արտգործնախարար Ռադոսլավ Սիկորսկին չէր բացառել, որ եթե Կրեմլի առաջնորդը Բուդապեշտ մեկնելու ճանապարհին օգտագործի Լեհաստանի օդային տարածքը, նրա ինքնաթիռը կարող է հարկադիր վայրէջք կատարել։