ԱՄՆ Գերագույն դատարանը կասկածի տակ է դրել Թրամփի մաքսատուրքերի օրինականությունը. The Washington Post

Չորեքշաբթի անցկացված լսումների ժամանակ ԱՄՆ Գերագույն դատարանի դատավորները կասկածներ են հայտնել Թրամփի վարչակազմի կողմից մաքսատուրքերի սահմանման իրավական հիմքերի վերաբերյալ, գրում է The Washington Post-ը։

Ըստ պարբերականի՝ դատավորները երկուսուկես ժամ «խիստ հարցաքննել» են ինչպես ներկայիս վարչակազմի, այնպես էլ հայցվորների ներկայացուցիչ փաստաբաններին, որոնք ներկայացնում էին տեղական ինքնակառավարման մարմինների պաշտոնյաներին և բիզնեսի ներկայացուցիչներին։ The Washington Post-ի գնահատմամբ՝ մաքսատուրքերի օրինականության վերաբերյալ Գերագույն դատարանի «թերահավատոլթյունը» կարող է վկայել, որ դատավորները Թրամփի սահմանած մաքսատուրքերի առնվազն մի մասը «կչեղարկեն կամ կսահմանափակեն»։

Axios-ը, իր հերթին, ընդգծում է, որ Գերագույն դատարանի առնվազն երկու դատավոր, որոնց ձայները կարող են վճռորոշ լինել վերջնական վճռի համար, «ցույց են տվել, որ կարող են հակված լինել» սահմանափակել մաքսատուրքերը։ «Որոշ պահպանողական դատավորներ կասկածներ են հայտնել Թրամփի նման հեռահար մաքսատուրքեր սահմանելու լիազորությունների վերաբերյալ»,- գրում է պորտալը։

Ավելի վաղ CBS News-ին տված հարցազրույցում Թրամփը համոզմունք էր հայտնել, որ եթե Գերագույն դատարանը մաքսատուրքերը անօրինական ճանաչի, ԱՄՆ տնտեսությունը «կգահավիժի դժոխք»։