Սպիտակ տան մամուլի քարտուղար Քերոլին Լևիթը հայտարարել է, որ դեմոկրատ օրենսդիրների՝ տխրահռչակ ֆինանսիստ Ջեֆրի Էփշթեյնի մի քանի էլեկտրոնային նամակների հրապարակումը ԱՄՆ նախագահ Դոնալդ Թրամփի հեղինակությունը արատավորելու փորձ է։
Ավելի վաղ Ներկայացուցիչների պալատի վերահսկողական հանձնաժողովի դեմոկրատները հրապարակել էին երեք էլեկտրոնային նամակ, որոնցում Էփշթեյնը հիշատակում է Թրամփին։
«Դեմոկրատներն ընտրողաբար էլեկտրոնային նամակներ են արտահոսել ազատական լրատվամիջոցներին՝ կեղծ պատմություն ստեղծելու և նախագահ Թրամփին արատավորելու նպատակով»,- ըստ CNBC-ի՝ հայտարարել է Լևիթը։
Լևիթը հավելել է նաև, որ այդ էլեկտրոնային նամակներում հիշատակվող «զոհը» մարդու իրավունքների պաշտպան Վիրջինիա Ջուֆրեն է, «որը բազմիցս հայտարարել է, որ նախագահ Թրամփը որևէ իրավախախտման մեջ ներգրավված չի եղել»։
«Փաստը մնում է փաստ. նախագահ Թրամփը տասնամյակներ առաջ Ջեֆրի Էփշթեյնին վռնդել է իր ակումբից՝ իր աշխատակիցների, նրանց թվում՝ Ջուֆրիի նկատմամբ անպատշաճ վարքագծի համար»,- ասել է Լևիթը։
2019 թվականին Էփշթեյնին Միացյալ Նահանգներում մեղադրանք է առաջադրվել անչափահասների սեռական շահագործման համար, որը նախատեսում է մինչև 40 տարի ազատազրկում, և սեռական շահագործման դավադրության համար (մինչև հինգ տարի ազատազրկում): Մեղադրողների տվյալներով՝ 2002-2005 թվականներին Էփշթեյնը սեռական հարաբերություններ է ունեցել տասնյակ անչափահաս աղջիկների հետ, որոնց հյուրընկալել է Նյու Յորքի և Ֆլորիդայի իր բնակարաններում: Նա նրանց կանխիկ հարյուրավոր դոլարներ է վճարել, իսկ տուժածներից մի քանիսին հանձնարարել է ծառայել որպես հավաքագրողներ՝ ավելի շատ աղջիկներ բերելու համար: Տուժածներից մի քանիսը տակավին 14 տարեկան էին։
2019 թվականի հուլիսի սկզբին Նյու Յորքի Մանհեթենի դատարանը, Էփշթեյնի մեղադրանքը լսելուց հետո, նրան կալանքի տակ պահելու և գրավի դիմաց ազատ չարձակելու որոշում ընդունեց: Նույն թվականի հուլիսի վերջին հաղորդվել է, որ Էփշթեյնը իր բանտախցում հայտնաբերվել է «կիսագիտակից» վիճկում, իսկ ավելի ուշ մահացել է: Հետաքննությունը եզրակացրել է, որ նա ինքնասպան է եղել: