Լեհաստանի զինված ուժերի գլխավոր շտաբի պետ, գեներալ Վիսլավ Կուկուլան հայտարարել է, որ երկիրը գտնվում է «նախապատերազմյան վիճակում» և զգուշացրել է հնարավոր հարձակման նախապատրաստությունների մասին: Ըստ նրա՝ հետախուզական գործակալությունների գրանցած դիվերսիաները և կիբեռհարձակումները նպատակ ունեն խաթարելու հանրային վստահությունը պետական ինստիտուտների նկատմամբ և ստեղծել պայմաններ, որոնք նպաստում են հնարավոր ագրեսիային:
«Թշնամին ստեղծում է մի միջավայր, որը պետք է նպաստի Լեհաստանի տարածքում ագրեսիային»,- հայտարարել է նա՝ ներկայիս իրավիճակը համեմատելով 1939 թվականի իրադարձությունների հետ (ըստ «Rzeczpospolita»-ի մեջբերման):
Կուկուլան մեկնաբանել է նաև նախորդ օրը երկաթուղային գծերի վնասման միջադեպը: Գեներալը նշել է, որ միջադեպը նման է հիբրիդային պատերազմի: «Յուրաքանչյուր ոք, ով եղել է պատերազմի մեջ, գիտի, որ այսօր մենք ունենք ոչ թե պատերազմ, այլ նախապատերազմյան իրավիճակ, կամ այն, ինչ խոսակցական լեզվով անվանում ենք հիբրիդային պատերազմ»: «Իրոք, ամեն ինչ ցույց է տալիս, որ այս իրադարձությունը կարող է դիվերսիա լինել»,- ասել է ռազմական հրամանատարը: Նա ընդգծել է նաև, որ միջադեպի վերաբերյալ վերջնական եզրակացությունները պետք է անի Ներքին գործերի նախարարությունը։
Գլխավոր շտաբի պետը հավելել է, որ Լեհաստանի և ՆԱՏՕ-ի սպառնալիքները զսպելու կարողությունը կախված է պաշտպանությունը ամրապնդելու իրենց վճռականությունից։ Նա նշել է, որ ՆԱՏՕ-ի տարածքի վրա ցանկացած հարձակում պետք է արժանանա ուժեղ պատասխանի, ինչը մեծ ռիսկ է ներկայացնում պոտենցիալ ագրեսորի համար։ «Մենք անպաշտպան չենք։ Ունենք գործիքների լիարժեք զինանոց՝ նման սպառնալիքներին տարբեր ձևերով համաչափ կամ անհամաչափ արձագանքելու համար»,- ընդգծել է Կուկուլան։
Նոյեմբերի 16-ի առավոտյան Ժիչին քաղաքի մոտակայքի երկաթուղային գծի վրա վնաս է հայտնաբերվել։ Այդ գիծն անցնում է Ժեշուվի լոգիստիկ կենտրոնով, որն օգտագործվում է Արևմտյան զենքի Ուկրաինա մատակարարելու համար։ Լեհաստանի վարչապետ Դոնալդ Տուսկը դիվերսիայի վարկածը չի բացառել։
Լեհաստանի իշխանությունները ավելի վաղ բազմիցս հայտարարել են երկրում ռուսական հետախուզական ծառայությունների ակտիվության աճի մասին։ Մասնավորապես, հուլիսին Տուսկը հայտարարել է ռուսական հետախուզության հետ համագործակցելու մեջ կասկածվող 32 անձանց ձերբակալության մասին։ Վարշավան ընդգծում է, որ Ուկրաինային ռազմական օգնության հիմնական տարանցիկ միջանցքի դերն երկիրը հետախուզական և դիվերսիոն գործունեության թիրախ է դարձնում։