Իրանի գերագույն առաջնորդ այաթոլլահ Սեյեդ Ալի Խամենեին «ակնհայտ սուտ» է անվանել այն պնդումը, ըստ որի Իրանի Իսլամական Հանրապետությունը վերջերս Սաուդյան Արաբիայի թագաժառանգի միջոցով ԱՄՆ նախագահին ուղերձ է հղել, հաղորդում է Mehr-ը։
Հինգշաբթի երեկոյան այաթոլլահ Խամենեին ելույթ է ունեցել երկրի, տարածաշրջանի և աշխարհի արդիական հարցերի վերաբերյալ։ Առաջնորդի ելույթը հեռարձակվել է Իրանի ազգային հեռուստատեսությամբ և ռադիոյով։
Այաթոլլահ Խամենեին անդրադարձել է մի շարք տարածաշրջանային և միջազգային հարցերի։ Հայտարարելով, որ Իրանի ժողովուրդը հունիսին տեղի ունեցած 12-օրյա պատերազմում հաղթել է Միացյալ Նահանգներին և Իսրայելին՝ պահպանելով իր միասնությունը, առաջնորդը շեշտել է, որ ռեժիմը և նրա կողմնակիցները չեն կարողացել հասնել իրենց նպատակներին։
Նա նշել է, որ Իսրայելը և Միացյալ Նահանգները 20 տարի պատրաստվել են ագրեսիայի և, ի վերջո, պարտվել են։
Իրանի գերագույն առաջնորդը հայտարարել է նաև, որ Իրանի Իսլամական Հանրապետությունը երբեք որևէ ուղերձ չի հղել ԱՄՆ ներկայիս կառավարությանը տարածաշրջանի որևէ քաղաքական գործչի կողմից՝ նման հայտարարները «ակնհայտ սուտ»անվանելով։ Նա նկատի ուներ որոշ լրատվամիջոցների հաղորդագրությունները, ըստ որոնց՝ Սաուդյան Արաբիայի թագաժառանգը ԱՄՆ նախագահ Դոնալդ Թրամփին է փոխանցել Իրանի նախագահ Մասուդ Փեզեշքիանի ուղերձը։
Նա ԱՄՆ ներկայիս կառավարությանը բնութագրել է որպես «պատերազմ հրահրող և սիոնիստական ռեժիմի հանցագործությունների մեղսակից», ընդգծելով, որ Իսլամական Հանրապետությունը ԱՄՆ կառավարությանն իր հետ բանակցելու «արժանի» չի համարում: