Տնտեսական տեսակետից TRIPP ներդրումը կստեղծի բազմաթիվ հնարավորություններ բիզնեսի համար Հայաստանում։ Այս մասին Դոհայում պանելային բանավեճի ժամանակ 23-րդ համաժողովի շրջանակում հայտնել է հանրապետության Անվտանգության խորհրդի քարտուղար Արմեն Գրիգորյանը։
«Ապրանքների եւ ծառայությունների շատ հոսքեր, որոնք անցնում են տարածաշրջանով, կանցնեն Հայաստանով։ Մենք վստահ ենք, որ դա ավելի էժան կլինի եւ կստեղծի ավելի շատ հնարավորություններ բիզնեսի համար, որը շահագրգռված կլինի Հայաստանով ապրանքների եւ ծառայությունների տեղափոխմամբ։ Եվ դա շատ դրական ազդեցություն կգործի։ Եվ ես կասեի, որ այո, մենք դեռ պատրաստ չենք տարածաշրջանային հաղորդակցությունների բացմանը, բայց շատ կարեւոր, դրական իրադարձություններ արդեն տեղի են ունեցել»,- ասել է նա։
Որպես օրինակ Հայաստանի Անվտանգության խորհրդի քարտուղարը բերել է Ադրբեջանի կողմից հայկական ապրանքների կամ Հայաստան մտնող ապրանքների տեղափոխման արգելքը։
«Հայաստանը հայտնել է նույնպիսի պատրաստակամության մասին, որ մենք կարող ենք մեր տարածքը տրամադրել Հայաստանով Ադրբեջանի համար ապրանքների տեղափոխման համար։ Այսպիսով, դա բազմաթիվ տնտեսական հնարավորություններ կստեղծի, եւ միանգամայն ակնհայտ է, որ ապաշրջափակումից հետո տարածաշրջանում ապրանքները կդառնան ավելի էժան հայ հասարակության, Ադրբեջանի համար, եւ դա բազմաթիվ հնարավորություններ կստեղծի։ Վերջին 3-4 տարիներին մենք կրկնապատկել ենք մեր ՀՆԱ-ն Հայաստանում բնակչության մեկ շնչի հաշվով, եւ մենք վստահ ենք, որ եթե ապաշրջափակումը տեղի ունենա, ապա ավելի շատ հնարավորություններ կստեղծվեն, եւ մենք կստանանք ավելի շատ օգուտ Հայաստանի հասարակության համար։ Ինչպես նաեւ խաղաղություն։ Ես նկատի ունեմ, որ ամենակարեւոր բարիքը խաղաղությունն է։
Ես վստահ եմ, որ խաղաղությունն օգուտ կբերի մեզ, ինչպես նաեւ ողջ Ադրբեջանին եւ տարածաշրջանի մյուս բոլոր երկրներին։ Եվ մենք ավելի շատ ներդրումներ կկատարենք տնտեսությունում, մշակույթում եւ այլ հնարավորություններ։ Որովհետեւ սովորաբար, երբ դուք հակամարտություն ունեք, դուք պետք է ավելի շատ ներդրումներ կատարեք անվտանգությունում, բայց երբ ձեզ մոտ հակամարտությունները քիչ են կամ երբ ձեզ մոտ խաղաղություն է, դուք ավելի շատ եք ներդրումներ կատարում տնտեսական հնարավորություններում, սոցիալական զարգացման մեջ, գիտությունում եւ այլ ոլորտներում, եւ դուք ստանում եք լավ արդյունքներ։ Եվ այսպես, դա միանգամայն ակնհայտ է, եւ մենք կշարժվենք այդ ուղղությամբ»,- ամփոփել է Արմեն Գրիգորյանը։