Ուկրաինան պատժամիջոցներ է մտցրել Ռուսաստանի «ստվերային նավատորմի» մոտ 700 լցանավերի դեմ, որոնք տեղափոխում են պատժամիջոցների տակ գտնվող ռուսական նավթը՝ հակառակ քաղաքակիրթ աշխարհի մտցրած սահմանափակումների, տեղեկացրել է «РБК-Украина»-ն՝ հղում կատարելով Ուկրաինայի նախագահ Վլադիմիր Զելենսկու հայտարարությանը, նախագահի աշխատակազմի կայքին եւ համապատասխան հրամանագրին։
Զելենսկին նշել է, որ Ուկրաինայի ներկայիս պատժամիջոցներն ուղղված են թշնամու մոտ 700 նավերի դեմ, որոնք օգնում են Կրեմլին ֆինանսավորել պատերազմը։ Սա Ռուսաստանի նավատորմի մեծ մասն է, որը տեղափոխում է նավթ եւ այլ էներգետիկ ռեսուրսներ։
«Սա ամենամեծ պատժամիջոցների փաթեթն է, որը հատուկ ուղղված է լցանավերի եւ ագրեսիային ծառայող այլ նավերի դեմ։ Փաթեթը ներառում է ոչ միայն Ռուսաստանի դրոշը կրող, այլեւ այլ պետությունների, մասնավորապես՝ ավելի քան 50 պետության նավեր»,- նշել է Ուկրաինայի նախագահը։
Զելենսկին ավելացրել է, որ Ուկրաինան կստիպի գործընկերներին արգելափակել յուրաքանչյուր նավ, յուրաքանչյուր նավատեր ընկերություն եւ ռուսական նավթի արտահանման ողջ ենթակառուցվածքը։
«Մենք աջակցում ենք ռուսական էներգետիկ արտադրանքի արտահանմանը մասնակցող նավերին ծովային ծառայություններ մատուցելու լիակատար արգելքի հայեցակարգին: Ռուսաստանի վրա ճնշումը եւ պատերազմը դադարեցնելու դիվանագիտությունը պետք է համընթաց լինեն՝ ցանկալի արդյունքի հասնելու համար»,- ընդգծել է նա։
Ուկրաինան նաեւ մոնիթորինգ է իրականացրել Սեւ, Կարմիր եւ Բալթիկ ծովերում եւ նույնականացրել է ռուսների կողմից օգտագործվող յուրաքանչյուր նավ։
«Պատժամիջոցների տակ գտնվող նավերը նավարկել են ավելի քան 50 երկրների դրոշների ներքո, առավել հաճախ՝ Գամբիայի, Սիերա Լեոնեի, Պանամայի եւ Կամերունի։ Ուկրաինան կտրամադրի համապատասխան բոլոր տեղեկությունները այդ երկրներին եւ կաշխատի նրանց հետ՝ լիցենզիաների տրամադրումը դադարեցնելու համար»,- նշվել է հաղորդագրությունում։