ԱՄՆ-ում Ավստրալիայի դեսպան Քևին Ռադը, որը Սպիտակ տուն վերադառնալուց առաջ խստորեն քննադատել էր ԱՄՆ նախագահ Դոնալդ Թրամփին, հրաժարական է տալիս նախատեսվածից մեկ տարի շուտ, հայտարարել է Ավստրալիայի վարչապետ Էնթոնի Ալբանեզեն, հաղորդում է NBC News-ը։
Ալբանեզեն լրագրողներին հայտնել է, որ դա «ամբողջովին Քևին Ռադի որոշումն էր» և որ նրա փոխարինողի անունը կհայտարարվի ավելի ուշ։
Նա նշել է, որ նախկին վարչապետ Ռադը դեսպանի պաշտոնում իր երեք տարիների ընթացքում «կոնկրետ արդյունքների» է հասել, դրանց թվում՝ ԱՄՆ կառավարության աջակցությունը AUKUS միջուկային սուզանավի գործարքի համար ապահովելը և ԱՄՆ-ի հետ հազվագյուտ մետաղների համաձայնագրի շուրջ բանակցություններ վարելը։
2024 թվականի նոյեմբերին Թրամփի ընտրություններում հաղթանակից հետո Ռադը հայտարարել է, որ «ԱՄՆ նախագահի պաշտոնի նկատմամբ հարգանքից դրդված» ջնջել է նրան վիրավորող նախկին առցանց մեկնաբանությունները:
Անցյալ տարվա հոկտեմբերին Ալբանեզեի Սպիտակ տուն կատարած այցի ժամանակ Ռադի քննադատության վերաբերյալ հարցին պատասխանելով՝ Թրամփը դիմել է սեղանի մյուս կողմում նստած դեսպանին և ասել. «Ես էլ քեզ չեմ սիրում, և հավանաբար երբեք էլ չեմ սիրի», ինչին հետևել է դահլիճում ներկաների ծիծաղը։
Սպիտակ տան խոսնակը Reuters-ին հայտնել է, որ «դեսպան Ռադը լավ է աշխատել նախագահ Թրամփի և վարչակազմի հետ։ Մենք նրան լավագույն մաղթանքներ ենք հղում»։
Նյու Յորքում գործող Asia Society վերլուծական կենտրոնը հայտարարել է, որ Ռադը մարտի 31-ին կվերադառնա կենտրոնի նախագահի և գործադիր տնօրենի իր պաշտոնին։ Ռադը իր X գրառման մեջ գրել է, որ կշարունակի աշխատել Նյու Յորքում և Վաշինգտոնում՝ կենտրոնանալով ԱՄՆ-Չինաստան հարաբերությունների ապագայի վրա, շեշտելով, որ «ինքը միշտ հավատացել է՝ դա մեր տարածաշրջանի և աշխարհի ապագա կայունության բանալին է»։