Գերմանիայի և Իսրայելի միջև նոր համաձայնագիրը նպատակ ունի հակազդելու կիբերսպառնալիքներին և ամրապնդելու անվտանգության ենթակառուցվածքները, խորհրդարանում հայտարարել է Գերմանիայի ՆԳ նախարար Ալեքսանդր Դոբրինդտը, հայտնել է Reuters-ը:
Դոբրինդտը համաձայնագիրը շաբաթավերջին ստորագրել է Իսրայելի վարչապետ Բենիամին Նեթանյահուի հետ՝ Երուսաղեմում։
Համագործակցությունը ներառում է համատեղ կիբերգմբեթային համակարգի մշակում, արհեստական բանականության և կիբերնորարարության կենտրոն, համագործակցություն անօդաչու թռչող սարքերից պաշտպանության ոլորտում և քաղաքացիական նախազգուշացման համակարգերի բարելավում։
«Մենք անցյալում արդեն հաստատել ենք վստահելի գործընկերություն, որը ցանկանում ենք ավելի ամրապնդել,- ասել է Դոբրինդտը,- Իսրայելը մեծ փորձ ունի կիբերպաշտպանության ոլորտում։ Մենք ցանկանում ենք օգուտ քաղել դրանից»։
Գերմանիայի Ներքին գործերի նախարարությունը երկուշաբթի հայտարարել է, որ համաձայնագիրը կներառի էներգետիկ ենթակառուցվածքների և միացված տրանսպորտային ցանցերի պաշտպանությունը, ինչպես նաև ընդլայնված համագործակցություն քաղաքացիական պաշտպանության, ահաբեկչության դեմ պայքարի և քրեական հետապնդման ոլորտներում։