Առաջին տիկին Մելանյա Թրամփը բացել է սակարկությունները Նյու Յորքի ֆոնդային բորսայում իր նոր ֆիլմի գովազդային արշավի շրջանակում, որի պրեմիերան տեղի կունենա ուրբաթ օրը։
Վաշինգտոնի ժամանակով 9:30-ին Մելանյա Թրամփը բացել է ա սակարկությունները աշխարհի առաջատար ֆոնդային բորսայում։ Արարողությունը տեղի է ունեցել նրա նոր ֆիլմը գովազդելու համար։ Ըստ միջոցառման հեռուստատեսային հեռարձակման՝ առաջին տիկնոջ ետևում սև տառերով սպիտակ ֆոնի վրա պաստառ էր փակցված՝ «Melania» վերնագրով։
Առաջին տիկնոջ մասին պատմող «Melania» ֆիլմի փակ ցուցադրությունը տեղի ունեցավ շաբաթ օրը Սպիտակ տանը՝ սահմանափակ լսարանի համար։ Ֆիլմը նախատեսված է ցուցադրել ուրբաթ՝ ԱՄՆ-ի և Կանադայի 1400-1500 կինոթատրոններում։
Ավելի վաղ Puck մեդիա ընկերությունը, հղում անելով ամերիկյան National Research Group (NRG) հետազոտական ընկերության տվյալներին, հայտնել էր, որ ԱՄՆ նախագահի կնոջ մասին Amazon MGM Studios ընկերության արտադրած և 75 միլիոն դոլար բյուջեով փաստագրական ֆիլմը կարող է առաջին շաբաթավերջին ԱՄՆ-ում և Կանադայում մոտ 5 միլիոն դոլար հավաքել։
Մարտին բրիտանական Financial Times պարբերականը՝ հղում անելով հարցին ծանոթ աղբյուրներին, հայտնել էր, որ ամերիկացի միլիարդատեր Ջեֆ Բեզոսին պատկանող Amazon Prime Video-ն ԱՄՆ առաջին տիկին Մելանյա Թրամփին մոտ 28 միլիոն դոլար է վճարել՝ նրա մասին վավերագրական ֆիլմը հեռարձակելու իրավունքի համար։