ԱՄՆ նախագահ Դոնալդ Թրամփը հայտարարել է, որ հանդիպել է Իսրայելի վարչապետ Բենիամին Նեթանյահուի հետ, քննարկել Գազայում տիրող իրավիճակը և պնդել է, որ Իրանի հետ բանակցությունները պետք է շարունակել։
«Ոչ մի վերջնական բան չի ձեռք բերվել, չհաշված այն, որ ես պնդել եմ շարունակել Իրանի հետ բանակցությունները՝ պարզելու համար՝ արդյոք հնարավոր է համաձայնության հասնել։ Եթե դա հնարավոր է, ես վարչապետին փոխանցել եմ, որ դա կլինի նախընտրելի տարբերակը»,- չորեքշաբթի Truth Social սոցիալական ցանցում գրել է նա։
Ըստ Թրամփի՝ եթե Իրանի հետ համաձայնագիրը ձախողվի, «մնում է տեսնել, թե ինչ արդյունքի դա կհասցնի»։
«Անցյալ անգամ Իրանը որոշեց, որ իրենց համար ավելի լավ է չկնքել համաձայնագիր, և նրանք հարված ստացան «Կեսգիշերային մուրճով» (ԱՄՆ հարվածներ 2025 թվականի հունիսին –IF), և դա վատ ավարտ ունեցավ նրանց համար։ Հուսանք, որ այս անգամ նրանք ավելի ողջամիտ և պատասխանատու կլինեն»,- նշել է Թրամփը։
ԱՄՆ նախագահը հավելել է, որ Իսրայելի վարչապետի հետ քննարկել է նաև Գազայում տիրող իրավիճակը։
«Մենք քննարկել ենք Գազայում և ամբողջ տարածաշրջանում գրանցված հսկայական առաջընթացը։ Իրականում, խաղաղությունը վերադարձել է Մերձավոր Արևելք»,- գրել է Թրամփը։
Ընդհանուր առմամբ, ԱՄՆ նախագահը Նեթանյահուի հետ իր հանդիպումը որակել է որպես «շատ լավ»։
«Դա շատ լավ հանդիպում էր, և մեր երկու երկրների միջև հիանալի հարաբերությունները շարունակվում են»,- ընդգծել է նա։
Ավելի վաղ Իրանի Ազգային անվտանգության գերագույն խորհրդի քարտուղար Ալի Լարիջանին հայտարարել էր, որ Իսրայելը մտադիր է ապակայունացնել ամբողջ Մերձավոր Արևելքը։