Իրանը չի ծրագրում երկրից դուրս հանել միջուկային նյութերը, այդ թվում բարձր հարստացված ուրանը։ Այս մասին տեղեկացրել է ISNA գործակալությունը՝ հղում կատարելով դիվանագիտական աղբյուրին։
«ԱՄՆ-ի հետ բանակցություններում մենք ընդգծել ենք, որ միջուկային նյութերը դուրս չեն բերվելու երկրից։ Ռուսաստանցիները նույնպես տեղյակ են սրան, նյութերը դուրս չեն բերվելու»,- ասել է գործակալության զրուցակիցը։
Միաժամանակ նշվել է, որ Թեհրանը կիջեցնի հարստացման մակարդակը։
CBS հեռուստաալիքը եւս տեղեկացրել է, որ ԱՄՆ նախագահ Դոնալդ Թրամփի վարչակազմը դիտարկում է Իրանին փետրվարի 21-ն հարվածելու հնարավորությունը։
The Wall Street Journal թերթի տվյալներով՝ Ժնեւում տեղի ունեցած ամերիկա-իրանյան բանակցություններում Թեհրանն առաջարկել է բարձր հարստացված ուրանի մի մասն ուղարկել երրորդ կողմ, օրինակ՝ Ռուսաստան, միջուկային ծրագրի հետ կապված Վաշինգտոնի մտահոգությունները ցրելու համար։ Պարբերականի տվյալներով՝ իրանական կողմը պատրաստ է դադարեցնել հարստացումը մինչեւ երեք տարի ժամկետով։ Սակայն Թրամփի վարչակազմը պնդում է, որ ծրագիրն ամբողջովին դադարեցվի։