Ռուսաստանի համար ավելի ձեռնտու կարող է լինել Եվրոպային գազի մատակարարումն անհապաղ դադարեցնելը՝ անցնելով այլ շուկաներ և չսպասելով լիակատար արգելքի ուժի մեջ մտնելուն, հայտարարել է նախագահ Վլադիմիր Պուտինը։
ՌԴ նախագահը կարծում է, որ այսօր եվրոպական շուկաներում տեղի ունեցողը սխալ էներգետիկ քաղաքականության արդյունք է։ «Սա «կանաչ օրակարգի» չարաշահում է, ներքին քաղաքական գործիքների օգտագործում և կուսակցական կամ ներխմբային նպատակների հետապնդում»,- ասել է նա։ Պուտինի խոսքով՝ թե՛ նավթի, թե՛ գազի գները բարձրացել են, և դա պայմանավորված է և՛ ռուսական նավթի սահմանափակումներով, և՛ «Իրանի դեմ ագրեսիայով»։
Նա նաև կարծիք է հայտնել, որ եվրոպական շուկայում գների այժմյան աճը «ուղղակիորեն կապված չէ եվրոպական շուկաներ գազի մատակարարման սահմանափակումների հետ»։
«Ի վերջո, գազի հիմնական մատակարարները՝ ԱՄՆ-ն, Նորվեգիան, Ալժիրը և, որոշ չափով, Ռուսաստանը, չեն կրճատել իրենց ծավալները։ Ոչ ոք չի կրճատել մատակարարումները, բայց գներն արդեն բարձրացել են մինչև 700 դոլար հազար խորանարդ մետրի համար։ Ինչո՞ւ։ Համաշխարհային շուկաներում, մասնավորապես՝ նավթի շուկաներում ընդհանուր իրավիճակի պատճառով»,- ասել է Պուտինը։
«Որովհետև ի հայտ են եկել հաճախորդներ, որոնք պատրաստ են նույն գազը գնել ավելի բարձր գներով՝ այս դեպքում՝ Մերձավոր Արևելքում տեղի ունեցող իրադարձությունների, Հորմուզի նեղուցի փակման և այլնի պատճառով։ Եվ եթե ի հայտ գան նման պրեմիում գնորդներ, ապա կարծում եմ, նույնիսկ վստահ եմ, որ որոշ ավանդական մատակարարներ, ինչպիսիք են ամերիկյան ընկերությունները, կթողնեն եվրոպական շուկան՝ ավելի բարձր վճարող շուկաների համար։ Սա բնական է։ Այստեղ ոչինչ չկա, քաղաքական օրակարգ չկա։ Միայն բիզնես»,- ընդգծել է նա՝ հավելելով, որ սա «եվրոպական իշխանությունների սխալ քաղաքականության արդյունքն է, ընդ որում՝ երկար տարիների ընթացքում»։
Պուտինը հիշեցրել է, որ Եվրամիությունը հայտարարել է ռուսական գազի գնման արգելքի մասին, որն աստիճանաբար ուժի մեջ է մտնում։
«Եվ հիմա բացվում են այլ շուկաներ։ Միգուցե մեզ համար ավելի ձեռնտու կլիներ հենց հիմա դադարեցնել եվրոպական շուկայի մատակարարումը։ Տեղափոխվել դեպի բացվող շուկաներ և այնտեղ ամրապնդվել։ Եվ այստեղ էլ ուզում եմ հստակ լինել՝ քաղաքական դրդապատճառ չկա։ Բայց եթե նրանք մեկ-երկու ամսից մեզ փակելու են, ավելի լավ է հիմա կանգ առնել և տեղափոխվել այն երկրներ, որոնք հուսալի գործընկերներ են և այնտեղ հաստատվել»,- ասել է նա։
Սակայն Պուտինը շեշտել է, որ «սա դեռ որոշում չէ»։ «Այս դեպքում սա, ինչպես ասում են, պարզապես բարձրաձայն մտածել է։ Ես անպայման կառավարությանը կհանձնարարեմ մեր ընկերությունների հետ համատեղ աշխատել այս հարցի շուրջ»,- ասել է Ռուսաստանի ղեկավարը։
Պուտինն այս հայտարարությունն արել է Հունգարիայի արտաքին գործերի նախարար Պետեր Սիյարտոյի հետ հանդիպումից հետո, որը խնդրել է իր երկիր ռուսական էներգամատակարարման երաշխիքներ։ Նախագահն այդ ժամանակ նշել է, որ Ռուսաստանը մնում է հուսալի էներգամատակարար բոլոր գործընկերների համար, որոնց թվում՝ եվրոպականների։ «Եվ մենք այս կերպ կաշխատենք այն գործընկերների հետ, ովքեր իրենք էլ հուսալի գործընկերներ են, ինչպիսիք են Հունգարիան և Սլովակիան (…): Իհարկե, եթե այդ երկրների ղեկավարությունը վարի նույն քաղաքականությունը, ինչ այսօր, այսինքն՝ որ նրանք լինեն մեզ համար հուսալի գործընկերներ»,- ընդգծել է Պուտինը։