Ոչ ուշ, քան երկու ամիս անց տեղի կունենան նոր Պատրիարքի ընտրությունները. կիրակնօրյա քարոզի ժամանակ հայտարարել է Բաթումիի և Լազեթիի միտրոպոլիտ Դիմիտրի Շիոլաշվիլին, հայտնում է Интерпрессньюс-ը։
Ըստ նրա, Պատրիարքը փոխհարաբերությունների, արժանապատվության, սիրո և հավատարմության չափանիշ էր։
«16 տարեկան էի, երբ Նորին Սրբությունը ձեռնադրվեց որպես Պատրիարք, ես Սվետիցխովելիում էի։ Ամբողջ կյանքս անցել է Սրբազանի կողքին։ Ամենակարևորն ու ամենածանրն այն ցավն ու զգացումն է, որը համակել է ինձ և ոչ միայն ինձ, այլև շատերին։ Մենք հրաժեշտ տվեցինք Պատրիարքին, ես տեսնում էի, թե ինչպես են մարդիկ լաց լինում, սգում, և մի զարմանալի զգացում ունեի. նա, ում ամբողջ կյանքում համարել ես ընտանիքիդ անդամը, պարզվեց՝ ոչ միայն քոնն է, այլև բազմաթիվ մարդկանց ընտանիքի անդամը, և դա մեծ վիշտ էր՝ խառնված ուրախության հետ։ Պատրիարքը հարաբերությունների, արժանապատվության, սիրո, հավատարմության չափանիշ էր։
Ոչ ուշ, քան երկու ամսից տեղի կունենան [նոր Պատրիարքի] ընտրությունները։ Դա կքննարկի նաև Միացյալ եկեղեցական ժողովը, իսկ հետո Սուրբ Սինոդը կհաստատի Պատրիարքին, որը կբազմի պատրիարքական գահին։ Աղոթենք, որ Աստծո կամքը կատարվի բարությամբ, խաղաղությամբ, շնորհով ու Աստծո ողորմությամբ»,- ասել է Դիմիտրի սրբազանը։
Համայն Վրաստանի Կաթողիկոս-Պատրիարք Իլիա II-ը վախճանվել է մարտի 17-ին՝ 93 տարեկան հասակում։
Հուղարկավորության արարողությանը ներկա են եղել տարբեր պատվիրակություններ, այդ թվում՝ Հայաստանի նախագահ Վահագն Խաչատուրյանի գլխավորած պատվիրակությունը։ Ամենայն հայոց կաթողիկոս Գարեգին Երկրորդը չի կարողացել հրաժեշտ տալ վրաց Պատրիարքին, քանի որ քննիչը չի բավարարել երկրից դուրս գալու արգելքը հանելու մասին միջնորդությունը։