Մերձավոր Արևելքի ալյումինի խոշորագույն արտադրող Emirates Global Aluminum (EGA) ընկերությունն Իրանի հասցրած ավիահարվածներից հետո դադարեցրել է Աբու Դաբիի իր Ալ Թավել հալման գործարանի աշխատանքը։ Դրա մասին ապրիլի 1-ին հայտնել է Bloomberg-ը՝ հղում անելով աղբյուրին։
«Աբու Դաբիի ծայրամասի գործարանը մնացել է առանց էլեկտրաէներգիայի մատակարարման, և հալման կայանքները, որոնք հայտնի են որպես էլեկտրոլիզի գծեր, հարկադրված անջատվել են առանց հսկողության։ Հալման գծերի ներսում մետաղը պնդացել է՝ առաջացնելով արտադրական գործընթացի զգալի խափանումներ»,- ասվում է հաղորդագրության մեջ։
Ինչպես նշել է ING Groep NV-ի հումքային ստրատեգ Եվա Մանթեյը՝ EGA-ի փակումը, Alba-ում արտադրության կրճատումների և Քաթարի Qatalum հալման գործարանում նախկինում սահմանված սահմանափակումների հետ մեկտեղ, կհանգեցնի տարեկան մոտ 3 միլիոն տոննա հզորության՝ Մերձավոր Արևելքի ալյումինի արտադրության գրեթե կեսի շահագործումից հանման։ Նա նշել է, որ սա «կտրուկ սրացում» է նախորդ անջատումների համեմատ և կհանգեցնի «ալյումինի ավելի խոր պակասի»։
Մերձավոր Արևելքն արտադրում է աշխարհի ալյումինի մոտավորապես 9%-ը, և Հորմուզի նեղուցի փաստացի փակումն արդեն հանգեցրել է տարածաշրջանի խոշորագույն արտադրողների համար կարևորագույն ռեսուրսների պակասի, գրում է Bloomberg-ը։