Հայաստանի գլխավոր խնդիրն առանձին անձինք չեն, այլ միանձնյա իշխանության ինստիտուցիոնալ մոդելը, որն ավելի ամրապնդվեց 2015 թվականի սահմանադրական փոփոխություններով։ Դրա մասին ապրիլի 10-ին Ազգային ժողովում հայտարարել է «Հանրային դաշինք» քաղաքացիական նախաձեռնության անդամ Հայկ Դորունցը՝ խորհրդարանական ընդդիմության կազմակերպած քննարկումների ժամանակ, որին մասնակցեցին արտախորհրդարանական ընդդիմության մի քանի ներկայացուցիչներ։
Նա ընդգծել է, որ համակարգային փոփոխությունների միակ իրական երաշխիքը հանրային պահանջարկն է, որը պետք է ստեղծվի բաց և հանրային քննարկումների միջոցով։
«Սահմանադրական և իրավական փոփոխությունների շուրջ համախմբումը կարող է նոր քաղաքական օրակարգի հիմք դառնալ»,- ասել է Դորունցը։
Քննարկման մյուս մասնակիցները ևս ընդգծել են սահմանադրական բարեփոխումների առաջնահերթությունը։