ՀՀ վարչապետ Նիկոլ Փաշինյանը բացահայտ հայտարարեց, որ հանրապետությունում ռուսական բիզնեսը սպառնալիքի տակ չէ, բայց փաստերն այլ բան են ասում, հայտարարել է Ռուսաստանի փոխվարչապետ Ալեքսեյ Օվերչուկը ТАСС-ին տված հարցազրույցում:
«Անցյալ ամռանը մենք ՀՀ վարչապետին ուղղակիորեն հարցրեցինք Հայաստանում ռուս ներդրողների հեռանկարների մասին: Մեր ուղիղ հարցին ուղիղ պատասխան տրվեց. Հայաստանում ռուսական բիզնեսը սպառնալիքի տակ չէ: Փաստերը, սակայն, այլ բան են ասում: Մենք տեսնում ենք, որ մեզ մի բան են ասում, մինչդեռ իրականում տեղի է ունենում բոլորովին այլ բան: Նախ, խախտվեցին էլեկտրաէներգիայի ձեռքբերման և մանրածախ առևտրի ոլորտում շահագրգիռ ռուս գործարարի սեփականության իրավունքները, իսկ հիմա ռուսական պետական ընկերությանն առաջարկվել է վաճառել կոնցեսիան»,- ասել է նա:
Ինչպես նշել է Օվերչուկը, Մոսկվան գիտակցում է, որ արևմտյականներից բացի, Հայաստանում կան մարդիկ, որոնք ցանկանում են կրճատել Ռուսաստանի հետ հարաբերությունները և հանրապետությունից հեռացնել ռուսական բիզնեսը: «Մենք տեսնում ենք, որ անցյալ տարի Հայաստանն ընդունեց հռչակագրային օրենք՝ Եվրամիությանը միանալու իր ցանկության մասին, և ջանքեր են գործադրվում ԵՄ չափանիշները ընդունելու համար: Մենք չենք կարող անտեսել երկրի ղեկավարների բազմաթիվ հայտարարությունները՝ Եվրամիությանը միանալու իրենց ցանկության մասին: Մեզ համար այս շրջանակ են տեղավորվում թե՛ ռուս գործարարի ունեցվածքի բռնագրավումը, թե՛ երկաթուղու կոնցեսիայի առաջարկվող վաճառքը»,- նշել է Ռուսաստանի փոխվարչապետը:
